БАЙРАМ КУНЛАРИ – ЎзРда расмий байрам деб эълон қилинган кунлар. МКнинг 131-м.га биноан улар 1 январь – Янги й.; 8 март – Хотин қизлар куни; 21 март – Наврўз байрами; 9 май – Хотира ва қадрлаш куни; 1 сентябр – Мустақиллик куни; 1 октябрь – Ўқитувчилар куни; 8 декабр – Конституция куни; Рўза ҳайити (Ийд ал–фитр) ва Қурбон ҳайити (Ийд Ал–адха) дир. Байрам кунлари ходимларни ишга жалб этиш қонун ҳужжатларида назарда тутилган алоҳида ҳолларда (МКнинг 130-м.) иш берувчининг фармойиши б-н ишга жалб қилиш мумкин. Бунда 18 ёшга тўлмаганларни жалб этиш мумкин эмас. Ёш болали ва ногирон ходимлар ўз розиликлари б-н жалб этилишлари мумкин. Байрам кунларида ишлаганлик учун камида икки баробар иш ҳақи тўланади. (муал. – М.Усмонова)
