ЖИНОИЙ ЙЎЛ БИЛАН ТОПИЛГАН МУЛКНИ ОЛИШ ЁКИ ЎТКАЗИШ – ЖКнинг 171-м.ига кўра, мулкнинг жиноий йўл б-н топилганлиги била туриб, уни олдиндан ваъда қилмаган ҳолда олиш ёки ўтказиш.
Била туриб жиноий йўл б-н топилган мулк деб бирон-бир жиноятни содир этиш натижасида қўлга киритилган мулк тушунилади. Жиноий йўл б-н эришилган мулкни олиш – бундай мулкнинг ўз эгалигига ва тасарруфига ўтказишга қаратилган пул, қимматлик эвазига ёки бепул олинишидан иборат. Мулкни олган шахс унга эгалик қилади, бегоналаштиради ёки ундан шахсан фойдаланади. Лекин унга бирга олинган мулкка нисбатан юридик эгаликнинг ҳуқуқи ўтмайди. Мулкни вақтинчалик сақлаб туришга берилиши ҳам жиноятда белгилаган олиш ҳисобланмайди.
Жиноий йўл б-н топилган мулкни ўтказиш дейилганда, мазкур мулкни бошқа шахсга ўтказишнинг барча усуллари (сотиш, ҳадя қилиш, қиморда ютқазиш, айирбошлаш ва ҳ.к.) тушунилмоғи лозим. Ўтказиш, ўз навбатида, пулли ёки пулсиз, мулкни ўзининг шахсий мулки сифатида тасарруф этиш ҳуқуқини қўлга киритадиган учинчи шахсга ўтказишдан иборат бир марталик ёки кўп марталик ҳаракатдир. Ўғирланган олдиндан маълум бўлган мулкни бирор мақсадда гаровга ёки вақтинча фойдаланишга бериш ҳам жиноий мазмунга эга. (муал. – Б.Ахроров)
