АКСИЛРЕКЛАМА – эълон қилинган реклама раддия сифатида берилган реклама бериш бўлиб, у ваколатли давлат органлари реклама тўғрисидаги қонун ҳужжатлари бузилганлигини аниқлаган тақдирда, ҳуқуқбузар мазкур органларнинг қарорига биноан ва улар кўрсатган муддатда А. бериши шарт. А. бериш ихтиёрий равишда ёки суднинг қарорига биноан ҳам амалга оширилиши мумкин. А. беришни амалга ошириш б-н боғлиқ барча харажатлар ҳуқуқбузар томонидан қопланади. Агар ҳуқуқбузар А.ни реклама тўғрисидаги қонун ҳужжатларига риоя этилиши устидан назоратни амалга оширувчи орган белгилаган муддатда бермаса, мазкур орган ҳуқуқбузарнинг рекламасини у А.ни бергунга қадар тўлиқ ёки қисман тўхтатиб қўйиш тўғрисида қарор қабул қилишга ҳамда реклама тўғрисидаги қонун ҳужжатларини бузган шахс б-н шартнома тузган тарафларни бундан хабардор қилишга ҳақлидир. А. раддия берилаётган реклама эълон қилинган айни ўша оммавий ахборот воситаларида, айни ўша муддат, макон, жой ва тартибдан фойдаланган ҳолда берилади. А.нинг мазмуни қонунбузарлик ҳолатини аниқлаган ва уни тузатиш тўғрисида қарор қабул қилган тегишли давлат органи б-н келишилади. Айрим ҳолларда бу органнинг қарорига биноан А. бериладиган оммавий ахборот воситаси, муддати, жойи ва тартиби ўзгартирилишига йўл қўйилиши мумкин. (муал. – И.Зокиров)
