2013 йилнинг 30 октябрь куни Ўзбекистон Республикаси Президенти Ислом Каримов “Жаҳон чемпионатларида юқори натижаларга эришган спортчиларни мукофотлаш тўғрисида”ги Фармонга имзо чекди. Бу ҳақида, ЎзА хабар бермоқда.
Мазкур Фармонга биноан, жаҳон чемпионатларида эришган ютуқлари билан Ватанимизнинг спорт соҳасидаги шон-шуҳратини юксалтиришда ибрат ва намуна кўрсатгани, мамлакатимизнинг халқаро миқёсдаги обрў-эътибори ва нуфузини оширишга қўшган муносиб ҳиссаси учун Руслан Нурудиновга “Ўзбекистон ифтихори”, Улуғбек Алимовга эса “Ўзбекистон Республикасида хизмат кўрсатган спортчи” фахрий унвонлари берилди.
ЎзА хабарига кўра, Польшанинг Вроцлав шаҳрида оғир атлетика бўйича ўтказилган жаҳон чемпионатида ўзбек полвони Руслан Нуриддинов жаҳон чемпиони унвонини қўлга киритган эди. Мазкур 80-жаҳон чемпионатида ўзбек полвони штангани даст кўтаришда 190, силтаб кўтаришда 235 ва иккикураш натижасига кўра, жами 425 килограмм натижа қайд этиб, умумий кўрсаткич бўйича иккинчи ўрин соҳиби Давид Беджанянни 20, Бартломей Войцех Бонкни 21 килограммга ортда қолдириб, биринчи ўринни эгаллади.
Улуғбек Алимов эса ўша мусобақада вазни 77 килограммгача бўлган спортчилар орасида штангани силтаб кўтаришда 197 килограмм кўрсаткич билан кумуш, иккикураш бўйича 355 килограмм натижа қайд этиб, бронза медалига сазовор бўлган эди.
