Хўжалик судларида видеоконференцалоқа режимидаги мажлислар ўтказилишга рухсат берилди

Аввал хабар берганимдек, 2014 йил 14 май куни Ўзбекистон Республикаси Президенти Ислом Каримов “Ўзбекистон Республикасининг айрим қонун ҳужжатларига ўзгартиш ва қўшимчалар киритиш, шунингдек айрим қонун ҳужжатларини ўз кучини йўқотган деб топиш тўғрисида”ги Қонунга имзо чекди.

Мазкур Қонун асосида 6 та Кодекс ҳамда 21 та Қонунга ўзгартиш ва қўшимчалар киритилди, шунингдек, айрим қонун ҳужжатлари ўз кучини йўқотди.

Хусусан, ушбу Қонун асосида Ўзбекистон Республикасининг Хўжалик процессуал кодексига айрим ўзгартиш ва қўшимчалар киритилди.

Жумладан, Кодексга “Хўжалик судининг видеоконференцалоқа режимидаги мажлисида иштирок этиш” деб номланган янги 126-1-модда қўшилди.

Бу шундан далолат берадики, бундан буён Хўжалик судларида низолар кўрилаётган вақтда вазият тақозо этса, видеоконференцалоқа ўрнатилиши мумкин.

Видеоконференцалоқа бошқа хўжалик суди билан ўрнатилади.

Видеоконференцалоқа режимидаги суд мажлисини ўтказишга кўмаклашадиган хўжалик суди ишда иштирок этувчи шахслар ва хўжалик судлов ишларини юритишнинг бошқа иштирокчилари вакиллари ваколатларини тасдиқловчи ишончномалар, шунингдек суд мажлисида тақдим этилган ёзма далиллар ишни кўраётган хўжалик судига юборилишини таъминлайди.

Кодекснинг 134-моддасига киритилган ўзгартишга кўра, суд мажлиси видеоконференцалоқа режимида ўтказилган тақдирда, баённомада бу ҳақдаги маълумот кўрсатилиши керак.

Агарда суд мажлиси ёпиқ тарзда кўрилаётган бўлса, ишни видеоконференцалоқа режимида кўришга йўл қўйилмайди.

Эслатиб ўтаман, мазкур ўзгаришлар 2014 йилнинг 1 сентябрдан кучга киради.

Шуни алоҳида таъкидлаш жоизки, хўжалик судлари ўз фаолиятларида замонавий технологиялардан фойдаланиш борасида кўплаб ўзгаришларни амалга ошириб бормоқда. Хусусан, 2013 йил 30 апрелда Хўжалик процессуал кодексига киритилган ўзгартириш бўйича, энди хўжалик судига ахборот тизими орқали электрон шаклда ҳам мурожаат қилиш мумкин этиб белгилангани ҳақида хабар берган эдим.

Хўжалик судларига даъво аризаларни қабул қилиш Олий Хўжадик Судининг расмий сайти – http://economical-court.uz орқали амалга оширилади.