21 март – Наврўз байрами кунидан бошлаб, умумий соврин жамғармаси салкам 10 миллион сўм бўлган ўзбек блогерлари ўртасидаги чемпионатга старт берилиши ҳақида хабар берган эдим. Батафсил
Хабарда таъкидланганидек, мазкур чемпионатни ўтказиш учун махсус портал яратилмоқда.
Ёдингизда бўлса, ўтган йили илк марта ўтказилган ушбу танлов асосан Facebook ижтимоий тармоғидаги гуруҳда ва қисман http://uzbloggerlar.blogspot.com блогида олиб борилган эди. Бу бироз қийинчилик ва ноқулайликлар туғдирганини инкор қилмаймиз.
Шу сабабли, танлов сифатини ошириш мақсадида навбатдаги чемпионат учун махсус сайт ишлаб чиқилмоқда. Ушбу сайтда барча танлов иштирокчилари рўйхати, чемпионатга тақдим этилган ишлар, блоглар каталоги, ҳакамлар томонидан қўйилган баҳолар билан танишишингиз, шунингдек, муштарий сифатида чемпионат қатнашчиларини баҳолашингиз ҳам мумкин бўлади.
Мазкур портал www.blog.telegraf.uz манзилида фаолият олиб боради. Порталга ўтиш
Шунингдек, тез орада чемпионатнинг тўлиқ қоидалари, ҳакамлар ҳайъати аъзолари рўйхати ҳам эълон қилинади.
Шу ўринда, кўпчилик томонидан берилаётган “Менинг блогим йўқ, қатнаша олмайманми?” деган саволларга жавоб бериб кетишни истардим. Ушбу танловда ҳамма қатнаша олади, ҳамма: блоги борлар ҳам, блоги йўқлар ҳам. Шахсий блогим йўқ эди деб сира ташвишга тушманг. Сиз чемпионатга тайёрланаверинг, биз Сизга қатнашиш имкониятини албатта яратиб берамиз.
Демак, ҳурматли дўстлар, тез кунларда ўзбек блогерлари ўртасидаги ажойиб чемпионат гувоҳига айланишингиз, бир-биридан ажойиб блоглардан баҳраманд бўлишингиз мумкин.
Чемпионатда кўришгунча!
