O‘zLiDeP Наманган вилоят кенгаши томонидан партиянинг “Оилавий тадбиркорликдан – мустаҳкам оилага” лойиҳаси доирасида ўқув семинари ўтказилди. Унда лойиҳанинг шаҳар, туман босқичларида фаол иштирок этган тадбиркор, фермер ва ишбилармон аёллар қатнашдилар.
Photo: O‘zLiDeP Матбуот хизмати
Тадбирда тадбиркорликни ривожлантириш, қўллаб – қувватлаш, O‘zLiDeP томонидан хотин-қизларнинг ижтимоий-сиёсий фаоллигини янада кучайтириш, тадбиркорликка кенг жалб этиш, “Оилавий тадбиркорлик тўғрисида”ги Ўзбекистон Реаспубликаси Қонунида белгиланган имтиёзлар хақида сўз юритилди.
– Кичик бизнес ва хусусий тадбиркорликни ривожлантиришда тижорат банкларининг алоҳида ўрни бор, – деди ўз сўзида Марказий банк вилоят бош бошқармаси ходими Абдурауф Абдураҳмонов.- Бу борада вилоят тижорат банклари томонидан ҳам катта ишлар амалга оширилмоқда. Жумладан, жорий йилнинг ўтган 5 ойи мобайнида тадбиркорликни қўллаб-қувватлаш учун 80 млрд. сўм миқдорида кредитлар ажратилган. Шундан 10 млрд. сўми тадбиркор аёлларга берилганлиги қувонарли ҳолдир.
Палатанинг ҳудудий ахборот марказларида тадбиркорларга ҳуқуқий, ташкилий масалаларда ҳар томонлама ёрдам кўрсатилмоқда. Жумладан, жорий йилнинг ўтган даври мобайнида вилоятда 1300 нафар тадбиркорлик субъектларига давлат рўйхатидан ўтиш, бизнес режаларни тайёрлаш, солиқ ҳисоботларини юритиш каби масалалар бўйича амалий консалтинг хизматлари кўрсатилди. Эътиборли жиҳати шундаки, мазкур субъектларнинг 75 фоизини хотин-қизлар ташкил этади.
Photo: O‘zLiDeP Матбуот хизмати
– Мен 2009 йилдан бери тадбиркорлик билан шуғулланаман, – дейди Учқўрғон туманидан “Садаф мебеллари” оилавий корхонаси раҳбари Ҳамидахон Тиллабоева. – Дастлаб уй-рўзғор учун зарур бўлган сандиқ ва жовонлар тайёрлаган бўлсак, 2013 йил май ойидан “Садаф мебеллари” номи билан оилавий корхонани ташкил қилдик. 2013 йилда 56 млн. сўмлик маҳсулотлар тайёрлаб буюртмачиларга етказиб бердик, бу йил 153 млн. сўмлик шартнома режаларини тузганмиз ва шу асосда иш олиб боряпмиз. O‘zLiDeP Наманган вилоят кенгаши “Аёллар қаноти” томонидан ташкил этилган бугунги ўқув семинар биз учун жуда ҳам фойдали бўлди. Мен “Микрокредитбанк” туман бўлимидан 7 млн. 900 минг сўм миқдорида имтиёзли кредит олиб, уни мақсадли ишлатдим ва кредитни муддатидан олдин қайтардим. Энди яна имтиёзли кредит олиш режам бор.
Ўқув семинарида, шунингдек, вилоят давлат солиқ бошқармаси, Наманган шаҳар ҳокимлиги қошидаги тадбиркорлик субъектларини давлат рўйхатидан ўтказиш инспекцияси вакиллари ҳам кичик бизнес ва хусусий тадбиркорликка яратилаётган шароитлар, имтиёзлар ҳақида тушунча бердилар.
Photo: O‘zLiDeP Матбуот хизмати
Тадбир якунида 27 нафар тадбиркор аёлга тижорат банкларининг имтиёзли кредитлари берилишини кафолотловчи сертификатлари топширилди.
Матн: O‘zLiDeP Матбуот хизмати
