Андижон вилоятида O‘zLiDeP Сиёсий Кенгаши Ижроия қўмитаси ва Олий Мажлис Қонунчилик палатасидаги фракцияси томонидан “Кичик бизнес ва хусусий тадбиркорлик субъектларини судларда ҳимоя қилиш: муаммо ва ечимлар” мавзусида амалий семинар ташкил этилди.
Photo: O‘zLiDeP Матбуот хизмати
Тадбирда O‘zLiDeP Сиёсий Кенгаши Ижроия қўмитаси ҳамда партиянинг Қонунчилик палатасидаги фракцияси вакиллари, Халқ депутатлари маҳаллий Кенгашларидаги депутатлик гуруҳлари, Хўжалик ва Ҳакамлик судлари, Адлия бошқармаси, ушбу соҳанинг тажрибали мутахассис-экспертлари, тадбиркорлар ва фермерлар иштирок этди.
Андижон вилоятида кичик бизнес ва хусусий тадбиркорлик ва фермерлик ҳаракатини жадал ривожланишига тўсқинлик қилаётган, эркинлигини чеклаётган муаммоларни ўрганиб бориш асосида соҳанинг ҳуқуқий асослари ва кафолатлари янада мустаҳкамлаб борилмоқда.
Ўзбекистон Республикасининг жорий йил май ойида қабул қилинган “Ўзбекистон Республикасининг айрим қонун ҳужжатларига ўзгартиш ва қўшимчалар киритиш, шунингдек айрим қонун ҳужжатларини ўз кучини йўқотган деб топиш тўғрисида”ги Қонунига мувофиқ Ўзбекистон Республикасининг Хўжалик процессуал кодексига, Жиноят кодексига, Маъмурий жавобгарлик тўғрисидаги кодексига киритилган бир қатор ўзгартиш ва янги нормалар тадбиркорлик субъектларининг ҳуқуқ ва манфаатлари ҳимоясини янада кучайтириш билан бирга даъвогар ва жавобгар томонларнинг ҳуқуқ ва мажбуриятларини оширади.
Ўтган йиллар мобайнида хўжалик судлари томонидан биринчи инстанцияда фуқаролик ҳуқуқий муносабатлардан келиб чиқадиган низолар бўйича кўриб чиқилган бир қатор ишларда тарафлардан бири ишни кўраётган хўжалик судидан бошқа ҳудудда жойлашган. Натижада кўплаб фуқароларимиз суд мажлисида иштирок этиш учун бошқа ҳудуддан келишган, – дейди Андижон вилоят Хўжалик суди раиси в.в.б Даврон Қосимов. – Шу жиҳатдан қарасак, 2014 йилнинг 1 сентябридан бошлаб суд мажлисларининг видеоконференцалоқа режимида ўтказилиши тадбиркорлик субъектлари учун жуда ҳам катта қулайликлар яратади.
O‘zLiDeP фаоллари хўжалик судлари фаолиятининг тубдан такомиллаштирилиши, адвокатлик институти ваколатининг кучайтирилиши партия электорати ҳисобланган ишбилармон доиралар ҳуқуқларини самарали ҳимоялашда муҳим қадам эканини эътироф этмоқдалар. Шунингдек, хўжалик судлари фаолиятини сифат жиҳатдан янги босқичга кўтариш ва бу жараёнда олиб борилаётган тизимли ислоҳотларни қўллаб-қувватлайди.
Тадбир якунида муҳокама қилинган масалалар юзасидан тегишли қарор қабул қилинди.
Матн: O‘zLiDeP Матбуот хизмати
