Ёшларни ҳар томонлама қўллаб-қувватлаш, уларнинг камол топишига яқиндан амалий ёрдам кўрсатиш ва тадбиркорликка кенг жалб этиш учун зарур шарт-шароитларни яратиш O‘zLiDePнинг доимо диққат марказида бўлиб келган. Айниқса, касб-ҳунар коллежларини битириб, меҳнат бозорига кириб келаётган ёшларимизни тадбиркорлик фаолиятига жалб қилиш, молиявий қўллаб-қувватлаш орқали чекка ҳудудларда янги иш ўринларини ташкил этишда ўзининг муносиб ҳиссасини қўшиб келмоқда.
Photo: O‘zLiDeP Матбуот хизмати
O‘zLiDeP томонидан ёш ишбилармонларнинг замонавий-иқтисодий билимларини ошириш, уларнинг қалбида ҳақиқий мулкдорлик туйғусини шакллантириш мақсадида 2004 йилдан буён анъанавий тарзда “Ишбилармон талаба” стипендияси кўрик-танлови ўказиб келинмоқда. Ўтган 9 йил мобайнида лойиҳада жами 30 мингга яқин академик лицей ва касб-ҳунар коллеж ўқувчилари иштирок этишди. Шундан 262 нафари партиянинг махсус стипендияси билан тақдирланди, лойиҳада қатнашган 5 мингдан зиёд ёшлар тадбиркорлик, фермерлик ва касаначилик билан шуғулланмоқда.
Кўрик-танловни уюшқоқлик билан ўтказишда Президентимизнинг 2014 йил 6 февралдаги «Ўзбекистон Республикасида ёшларга оид давлат сиёсатини амалга оширишга қаратилган қўшимча чора-тадбирлар тўғрисида»ги Қарори ҳамда 2010 йил 28 июлдаги «Таълим муассасаларининг битирувчиларини тадбиркорлик фаолиятига жалб этиш борасидаги қўшимча чора-тадбирлар тўғрисида»ги Фармони дастуриламал бўлмоқда.
2004-2010 йиллар давомида ҳар йили лойиҳанинг 14 нафар ғолибига O‘zLiDePнинг махсус стипендияси берилган бўлса, 2011-2012 йилларда 28 та, 2013 йилда эса бу кўрсаткич 38 тага кўтарилган. Жорий йилнинг август ойида бўлиб ўтадиган лойиҳанинг Республика босқичида 42 нафар ўқувчига стипендия бериш режалаштирилмоқда.
O‘zLiDeP томонидан иқтисодий тараққиётнинг муҳим омили бўлган кичик бизнес вакиллари ҳамда ёшларнинг тадбиркорлик салоҳиятини юксалантиришга, уларни қўллаб-қувватлашга катта эътибор қаратилаётгани бежиз эмас. Чунки иқтисодиёт тармоқларида иш билан банд бўлган аҳолининг 75 фоизи кичик бизнес улушига тўғри келмоқда. Ўтган давр мобайнида партия лойиҳалари доирасида бизнес-инкубаторлар, инновация марказлар, ёш тадбиркорлар мактаби каби ташкилотлар ҳамкорлигида махсус семинарлар ва ўқув курслари ташкил этилиб, юзлаб янги-янги ёш истеъдодлар кашф этилди, кўплаб ёшлар эгаллаган мутахассисликлари бўйича тадбиркорлик фаолиятларини йўлга қўйиб, иқтисодиётимиз ривожига муносиб ҳиссаларини қўшиб келмоқдалар.
Матн: O‘zLiDeP Матбуот хизмати
